Само 30 минути интензивна физичка активност неделно може да бидат доволни за подобрување на здравјето на срцето, покажува ново истражување на Норвешкиот универзитет за наука и технологија.
Според научниците, најдобар ефект се постигнува ако активноста се распореди во текот на неделата, на пример четири пати по околу седум и пол минути.
Истражувањето покажало дека ваквото вежбање може да помогне во контрола на крвниот притисок и нивото на шеќер во крвта.
За активноста да се смета за висок интензитет, пулсот треба значително да се забрза, а лицето да остане без здив и да не може нормално да разговара. Во оваа категорија спаѓаат активности како трчање, спининг или тенис.
Кардиологот Џејсон Цо од Универзитетот Стенфорд истакнува дека и кратките, но интензивни тренинзи можат да донесат значајни придобивки за срцето и крвните садови.
Сепак, експертите предупредуваат дека лицата со висок крвен притисок, дијабетес, висок холестерол или срцеви заболувања треба претходно да се консултираат со лекар пред да започнат со интензивно вежбање.
Лекарите нагласуваат дека и малку физичка активност е подобра од никаква, а редовното вежбање помага не само за срцето, туку и за подобро расположение, поквалитетен сон и намален ризик од повеќе болести.
