Само 9 од 62 локомотиви во функција, загубите на ЖРСМ Транспорт достигнуваат над 109 милиони евра

Само девет од вкупно 62 локомотиви на ЖРСМ Транспорт се во функција, а акумулираните загуби на друштвото достигнале 6,75 милијарди денари, односно околу 109 милиони евра. Ова го покажува ревизорскиот извештај на Државниот завод за ревизија за работењето на претпријатието во 2024 година.

Ревизијата утврдила повеќе слабости во управувањето со средствата, возниот парк, имотот, залихите, трошоците и приходите. Покрај деветте функционални локомотиви, од 16 патнички гарнитури во функција се само пет, додека од 47 патнички вагони редовно се користат само два.

— реклама —

Состојбата е неповолна и кај товарниот возен парк. Од вкупно 1.382 товарни вагони, само 378 имаат важечка ревизија и се способни за сообраќај, додека 1.004 се надвор од употреба поради истечена ревизија. Според ревизорите, застареноста на возниот парк и недоволните инвестиции во поправки, резервни делови и обновување на капацитетите го отежнуваат работењето и ја зголемуваат потрошувачката на енергенси.

— реклама —

Утврдено е и дека реконструираните работилници за одржување на железнички возила, вредни 118 милиони денари, односно околу 1,9 милиони евра, не биле евидентирани како недвижност во деловните книги, иако поседувале потребни дозволи и со години се користеле. Поради тоа, не биле пресметани ниту трошоците за амортизација во претходните години и во 2024 година.

Ревизијата посочува и на неправилности во евидентирањето на имотот и залихите. Дури 71 отсто од залихите, во вредност од 342,3 милиони денари, биле постари од 2019 година, а не било извршено нивно вредносно усогласување. Забележано е и несоодветно ракување со нафтените деривати, со застарена опрема за мерење која овозможувала манипулации и пумпи за гориво чии мерила подолго време не биле баждарени.

— реклама —

Дополнителни слабости биле утврдени во контролата на потрошувачката на вода, наплатата на приходите, договорните односи, ценовната политика и управувањето со човечките ресурси. Друштвото не резервирало средства ниту за обврски од правосилно завршени судски постапки и очекувани одливи во износ од околу 261 милион денари, односно 4,24 милиони евра.

— реклама —

Загубата на ЖРСМ Транспорт за 2024 година изнесувала 331,8 милиони денари. Иако е намалена во однос на претходната година, заедно со пренесените загуби од претходните години достигнала 6,75 милијарди денари.

Државниот завод за ревизија дал препораки за надминување на утврдените слабости. Од ЖРСМ Транспорт, пак, на 2 ноември 2026 година доставиле информација за досега преземените активности по препораките, која е објавена како составен дел од конечниот ревизорски извештај.