Подобрувањето на физичката форма и намалувањето на телесната тежина не мора да значат повеќечасовни тренинзи неколку пати неделно, покажува ново научно истражување на Медицинскиот факултет при Универзитетот во Хонг Конг.
Научниците откриле дека интервалното брзо одење само еднаш неделно може значително да го намали уделот на масното ткиво и да ја подобри функцијата на срцето и белите дробови кај лица со зголемени масни наслаги во пределот на стомакот.
Резултатите, објавени во списанието „Nature Communications“, покажале дека 75-минутен интервален тренинг еднаш неделно бил речиси подеднакво ефикасен како и традиционалните програми со три тренинзи неделно.
Во тригодишното клиничко истражување учествувале 315 возрасни лица со прекумерна телесна тежина. Испитаниците биле поделени во три групи: едната вежбала еднаш неделно 75 минути, втората истото времетраење го распределила во три одделни тренинзи, додека контролната група не вежбала.
По 16 недели, двете групи што биле физички активни покажале речиси идентични резултати – намалување на телесната тежина, процентот на масти и обемот на струкот, како и значително подобрување на кардиореспираторната функција.
Истражувачите нагласуваат дека тренинзите трипати неделно и понатаму остануваат препорачана опција, но новите сознанија нудат практично решение за луѓето со динамичен начин на живот и недостаток на време.
„Наместо да инсистираме исклучиво на почести тренинзи, моделот на вежбање еднаш неделно треба да се прифати како изводлива и ефикасна алтернатива“, порачуваат авторите на студијата.
