Самсунг Електроникс во последен момент избегна штрајк, откако вработените го одобрија новиот договор за плати и бонуси, во време кога компанијата бележи силен раст поради побарувачката за чипови за вештачка интелигенција.
За договорот гласале 74 проценти од повеќе од 62.000 членови на синдикатот, а тој опфаќа околу 78.000 вработени, главно во секторот за полупроводници.
Според Ројтерс, дел од работниците во секторот за мемориски чипови би можеле да добијат бонуси од околу 416.000 долари, благодарение на глобалниот ВИ-бум и растечката побарувачка за чипови што се користат во дата-центри и системи за вештачка интелигенција.
Новиот договор предвидува просечно зголемување на платите од 6,2 проценти, како и посебен систем на бонуси. Самсунг ќе издвојува 10,5 проценти од оперативната добивка на чип-дивизијата за специјални бонуси, кои главно ќе се исплаќаат во акции.
Синдикатот претходно тврдеше дека вработените во Самсунг заостануваат зад работниците во конкурентската компанија Ес-Ке Хајникс, кои добиле повисоки бонуси.
По објавувањето на договорот, акциите на Самсунг пораснаа за околу шест проценти.
Сепак, договорот предизвика незадоволство кај дел од вработените во секторите за потрошувачка електроника и уреди, кои сметаат дека се фаворизираат работниците во производството на полупроводници.
Во меѓувреме, Самсунг најави и нова инвестиција од околу 1,5 милијарди долари во Виетнам, каде што планира изградба на погон за тестирање полупроводници во близина на Ханој.
Компанијата очекува новиот капацитет да почне со работа во 2027 година и да биде насочен кон тестирање постари мемориски чипови, за кои и натаму има голема побарувачка на светскиот пазар.
