Санирана критичната косина на А4: Поставени мрежи и систем за одведување на водата

Јавното претпријатие за државни патишта ја заврши санацијата на косината на автопатот А4, на делницата Миладиновци – Свети Николе – Штип, во близина на наплатната станица „Преод“.

— реклама —

Од ЈПДП информираат дека интервенцијата била изведена за стабилизирање на косината, спречување понатамошна ерозија и намалување на ризикот од свлекување материјал кон автопатот.

Во рамки на работите е изграден ободен одводен канал зад косината за контролирано собирање и одведување на површинските води.

— реклама —

Ерозивните делови биле расчистени и репрофилирани, а поставена е и композитна мрежа за површинска стабилизација и заштита од ерозија.

— реклама —

На местата каде што биле утврдени нестабилност и локални свлекувања е отстранет нестабилниот материјал, по што косината била повторно оформена и стабилизирана. Извршена е и исполна со кршен камен и поставена заштитна жичана мрежа.

Од претпријатието велат дека со санацијата се подобрува безбедноста на оваа делница од А4 и се намалува ризикот за возилата поради евентуални одрони и свлечишта.

— реклама —

ЈПДП најавува дека се подготвуваат активности за санација и на други свлечишта и одрони на државната патна мрежа.