Шасивари: Холандија е силен партнер во градењето ефикасен и независен правосуден систем

Министерот за правда Јетон Шасивари денеска оствари средба со амбасадорката на Кралството Холандија во Македонија, Узлем Џанел, на која беше потврдена заедничката заложба за продлабочување на соработката во спроведувањето на реформите во правосудството и зајакнувањето на владеењето на правото.

— реклама —

На средбата беше истакнато дека Холандија останува значаен партнер во процесот на градење ефикасен, независен и транспарентен правосуден систем преку поддршка на повеќе проекти насочени кон унапредување на работата на правосудните институции.

— реклама —

„Правдата мора да биде видлива, ефикасна и еднакво достапна за сите. Реформите во правосудството не се само европска обврска, туку и наша одговорност кон граѓаните. Поддршката од Кралството Холандија претставува значаен поттик во овој процес“, изјави министерот Шасивари.

На средбата беше разговарано и за досегашната соработка во областа на владеењето на правото, јакнењето на отчетноста и транспарентноста на правосудните институции, поддршката на Академијата за судии и јавни обвинители, како и за реформите во пенитенцијарниот и пробацискиот систем.

— реклама —

Двете страни оценија дека соработката во областа на меѓународната правна помош се одвива на високо професионално ниво.

— реклама —

Од Министерството за правда посочија дека остануваат посветени на спроведувањето на суштински реформи, зајакнувањето на независноста и интегритетот на правосудниот систем и натамошното продлабочување на партнерството со земјите што го поддржуваат европскиот реформски процес на Македонија.