Кина забрзано ја проширува својата програма за нуклеарно оружје на најмалку седум клучни локации, покажува анализа на сателитски снимки објавена од „Телеграф“. Станува збор за обемни градежни активности на нуклеарни постројки и полигони за тестирање.
Како седум локации се наведуваат Пингтонг, Зитонг, Лоп Нур, Џуканг, Мианјанг, Џинта и Гуангјуан. Според експертите цитирани во анализата, промените на овие места укажуваат на значително проширување на кинеските нуклеарни капацитети.
На локацијата Пингтонг, сместена во планински предел во централна Кина, се верува дека се произведуваат плутониумски компоненти за нуклеарни боеви глави. Комплексот, чија изградба започнала во 2013 година, во меѓувреме значително се проширил. Изградени се нови контролни пунктови, мост и дополнителни безбедносни структури, како и објекти за сместување и превоз на работниците.
Сателитските снимки покажале и воени товарни возила, вентилациски системи, индустриска опрема и складишта за хемиски отпад.
Во Зитонг, пак, е изградена цевка долга околу 600 метри, за која експертите сметаат дека може да се користи за тестирање на отпорноста на нуклеарното оружје на експлозии. Во близина се забележани и структури за кои постои сомневање дека се тест-комори.
На Лоп Нур, каде што Кина го извршила првиот нуклеарен тест во 1964 година, снимките покажуваат развој на нови тестни подрачја и инфраструктура.
Според Рени Бабијарц, експерт за геопросторна разузнавачка анализа, промените укажуваат на проширени можности за подземно тестирање и можен развој на нови системи и боеви глави.
Во анализата се споменува и центар за истражување на фузијата, каде што кинеските научници користат моќни ласери за проучување на однесувањето на материјалите при екстремни услови.
Според податоците на SIPRI, кинескиот нуклеарен арсенал значително се зголемил под претседателот Си Џинпинг и достигнал околу 620 боеви глави, со проценка дека бројката може да достигне 1.500 до 2035 година.
Според американски проценки, Кина сега располага со повеќе лансери за интерконтинентални балистички ракети од Русија или САД, а дел од ракетите во кинеските силоси веројатно веќе се опремени со нуклеарни боеви глави.
