Саудиска Арабија подготвува напад: Цивилите повикани итно да се евакуираат

Коалицијата предводена од Саудиска Арабија најави операција против нафтен објект во јеменскиот главен град Сана и ги повика цивилите во таа област итно да се евакуираат.

Бунтовничкото движење Хути одговори со закана дека секој напад врз Сана ќе предизвика жесток одговор во Ријад, главниот град на Саудиска Арабија.

— реклама —

Портпаролот на коалицијата, Турки ел Малики, го објави предупредувањето на социјалната мрежа Икс, откако биле регистрирани закани со беспилотни летала во близина на Ријад.

„Наскоро ќе издадеме предупредување до цивилите да се евакуираат од локацијата во Сана, со цел да се спроведе квалитативна операција“, навел Ел Малики.

— реклама —

Сана и поголемиот дел од западен Јемен се под контрола на Хутите, чиј воен портпарол, Јахја Сари, брзо реагираше на најавата за нападот.

„Секој напад врз Сана ќе наиде на жесток и болен одговор во самиот Ријад“, порача Сари преку Телеграм.

— реклама —

Градскиот аеродром во Ријад и неговата околина од почетокот на минатата недела повеќепати биле мета на ракетни напади и напади со беспилотни летала.

Како одговор на најавата на саудиската коалиција, Хутите издадоа сопствено предупредување, повикувајќи ги граѓаните и работниците во Саудиска Арабија итно да се оддалечат од нафтените постројки на компанијата Арамко.

— реклама —

Арамко е саудиска државна нафтена компанија која управува со големи нафтени капацитети и рафинерии во земјата.

Сари предупреди дека Хутите ги сметаат сите рафинерии на Арамко за легитимни цели. Тој порача дека престојот во нивна близина претставува непосредна опасност, без оглед на тоа дали тие објекти биле претходно нападнати.