Саудиска Арабија погубила маж и жена поради „непристоен чин“ во џамија

Властите во Бангладеш дознале за погубувањето на двајца свои државјани во светиот град Мека дури откако казната била извршена, објавија локалните медиуми.

Маж и жена од Бангладеш биле погубени минатата среда, откако биле осудени за извршување „непристоен чин“ во џамија, соопштило саудиското Министерство за внатрешни работи. Не било прецизирано за каков чин станува збор, а според информации што се шират на интернет, наводно станувало збор за бакнување во чело, пренесува Би-би-си.

— реклама —

Бангладеш побарал дополнителни информации од саудиските власти за случајот и судската постапка. Двете муслимански земји имаат блиски односи поради верските врски и силната економска соработка.

Повеќе од три милиони државјани на Бангладеш живеат и работат во Саудиска Арабија, главно на слабо платени работни места. Веста за погубувањето предизвикала загриженост во Бангладеш.

— реклама —

Според саудиското Министерство за внатрешни работи, двајцата биле осудени на смрт врз основа на правниот принцип „тазир“, според кој судијата ја определува тежината на казната. Во соопштението било наведено дека смртните казни биле изречени поради тежината на делото и нарушувањето на светоста на џамијата.

„Бангладеш побара од саудиската влада информации за сторените дела и судската постапка. По добивањето одговор од саудиските власти, владата ќе ги разгледа следните чекори, вклучително и можноста телата на погубените да бидат вратени во татковината“, изјавила државната министерка за надворешни работи Шама Обаед Ислам. Таа додала дека владата е посветена на заштитата на благосостојбата и интересите на своите државјани во странство.

— реклама —

Според весникот „Дејли стар“, имињата на двајцата се наоѓале на списокот со затвореници што Саудиска Арабија му го доставила на Бангладеш, на барање на генералниот конзулат на земјата во Џеда. Сепак, во списокот не било наведено дека тие биле осудени на смрт.

Погубувањето на странски државјани не е изолиран случај во Саудиска Арабија. Според податоците на „Амнести интернешнл“, оваа година во земјата биле погубени околу 100 лица, од кои многумина биле странски државјани осудени за кривични дела поврзани со дрога.

Во 2011 година, во главниот град Ријад јавно биле погубени осум мажи од Бангладеш, осудени за убиство на египетски државјанин.

Претходно овој месец, Саудиска Арабија ја поништила смртната казна за државјанин на Шри Ланка, осуден за богохулење поради коментар објавен на Фејсбук. Одлуката уследила по бурните реакции во Шри Ланка и дипломатските напори да се обезбеди помилување за мажот.