„СДС со години ги запоставуваше студентските домови, а денес глуми загриженост, ВМРО-ДПМНЕ инвестира и го подобрува студентскиот стандард“, велат од ВМРО-ДПМНЕ

ВМРО-ДПМНЕ преку соопштение реагира на критиките од СДСМ за условите во студентските домови, обвинувајќи ја опозициската партија дека со години не вложувала во нивното одржување и реконструкција, а сега се обидува да собира политички поени на сметка на студентите.

— реклама —

Од партијата велат дека актуелната Влада презема конкретни чекори за подобрување на студентскиот стандард и дека наместо политички критики, СДСМ треба да ги поздрави инвестициите и започнатите проекти.

— реклама —

Како еден од примерите ја посочуваат средбата на претседателот на ВМРО-ДПМНЕ, Христијан Мицкоски, со претставници на студентските парламенти од универзитетите во Македонија, на која се разговарало за проблемите и потребите на студентите.

Од ВМРО-ДПМНЕ информираат дека се разгледува предлог студентскиот оброк, наместо сегашните 3.500 денари, да изнесува 4.500 денари месечно преку дигиталната апликација М-услуги, со дополнителни попусти од 20 до 25 проценти во ресторани, маркети и угостителски објекти.

— реклама —

Во соопштението се наведува и дека студентскиот дом „Стив Наумов“, со капацитет за 1.150 студенти, е пуштен во употреба, а до крајот на годината се очекува да биде отворен и домот „Кузман Јосифовски-Питу“, кој е во фаза на реконструкција. Партијата ги посочува и изградбата на кампусот на Универзитетот „Мајка Тереза“ и другите активности за подобрување на условите за студентите.

Од ВМРО-ДПМНЕ тврдат дека студентскиот стандард во 2026 година е двојно подобрен во споредба со 2022 година. Според партијата, разликата меѓу нивниот пристап и оној на претходната власт е во тоа што, како што наведуваат, СДСМ оставил нерешени проблеми, додека актуелната Влада инвестира и предлага нови решенија.