СДСМ преку соопштение ги отфрла барањата на Божиновска за извинување и повлекување на обвинувањата, наведувајќи дека за своите тврдења поседува документи и податоци од јавни регистри.
Од партијата посочуваат дека Божиновска во периодот од 2011 до 2014 година била извршен директор на „Руднап Група“ за Централна и Источна Европа, со одговорности за активности во Македонија, Србија, Бугарија и регионот. Според СДСМ, од 23 март 2012 до 11 март 2014 година била и управител на „Руднап Бугарија“ ЕООД, компанија која во 2012 година остварила промет од над 130 милиони бугарски лева.
СДСМ тврди дека нејзиното име се појавува и во документација поврзана со загрепската компанија на „Руднап“, а партијата посочува и на нејзиниот претходен ангажман во ЕЗПАДА, компанија за меѓународна трговија со електрична енергија.
Во соопштението се наведува и дека на 11 август 2026 година ЕВН склучила договор во вредност од околу 13,2 милиони евра со српската компанија METER&CONTROL за набавка на броила. СДСМ ја поврзува компанијата со групацијата на Војин Лазаревиќ и поставува прашања за евентуалната поврзаност со претходниот професионален ангажман на Божиновска.
Од партијата дополнително го посочуваат Душан Адамовиќ како, како што тврдат, врска меѓу Лазаревиќ и актуелната власт. СДСМ изнесува тврдења и за негови деловни и политички врски, како и за неговата улога во увозот на електрична енергија.
„Фактите не се лаги. Тие се регистар“, порача СДСМ, додавајќи дека наместо извинување очекува надлежните институции да ги проверат изнесените наводи.
Божиновска претходно ги отфрли тврдењата на СДСМ, наведувајќи дека повеќе од 12 години нема никаква деловна или приватна релација со „Руднап“, ниту поврзаност со предметната набавка што ја спроведува ЕВН. Таа побара СДСМ во рок од 24 часа да ги повлече тврдењата и најави правни чекори доколку тоа не се случи.
