СДСМ: Мицкоски донесе сиромаштија, изолација и празни фрижидери – милиони има за Гета, но не и за граѓаните

СДСМ упати низа обвинувања кон премиерот Христијан Мицкоски и ВМРО-ДПМНЕ, оценувајќи дека нивното владеење донело влошување на животниот стандард, задолжување, економски проблеми и застој во евроинтеграциите. Опозициската партија ги обвинува власта и премиерот за нетранспарентно трошење јавни пари, спорни договори и отсуство на одговорност.

„Две и пол години ВМРО-ОКГ и Мицкоски, што доби Македонија? Сиромаштија, изолација и празен фрижидер!“, се наведува во соопштението на СДСМ.

Од партијата повторно го отвораат прашањето за настапот на диџејот Дејвид Гета, тврдејќи дека, и покрај претходните изјави на Мицкоски дека настанот не чинел ништо, за него биле потрошени 5,53 милиони евра од Државната лотарија.

„Гета. Нула денари чини, рече арамијата Мицкоски. За 24 часа вистината излезе на виделина: 5,53 милиони евра од Лотарија. Дивиденда што требаше да оди во буџет. Пари на граѓаните, фрлени на бина“, обвинуваат од СДСМ.

— реклама —

Партијата изнесува критики и за најавените рударски проекти, споменувајќи пет нови рудници во просторниот план до 2040 година и проект за антимон кај Крива Паланка. Според СДСМ, за проектот бил предвиден грант од пет милиони долари, што го споредуваат со трошоците за концертот.

Од СДСМ предупредуваат и на можни последици од рударството врз почвата и водите, а отвораат прашања и за потрошувачката на електрична енергија и вода од планираните дата-центри.

Во соопштението се наведуваат и обвинувања за состојбата со водоснабдувањето и загадувањето. СДСМ тврди дека во Гостивар со недели нема извештај што ја потврдува исправноста на водата, дека повеќе од 50 населени места немаат соодветни информации и дека остануваат неодговорени прашањата за загадувањето на Лепенец и Вардар.

Партијата ја критикува и состојбата со комуналната хигиена во Скопје, наведувајќи дека отпад има на повеќе локации, додека, според нив, изостанува одговорноста.

— реклама —

СДСМ упатува обвинувања и за јавните набавки, енергетскиот сектор и најавените проекти за електрични броила и автобуси. Во тој контекст споменува повеќе лица и компании, меѓу кои „Руднап“, но во доставеното соопштение не приложува документи со кои би се потврдиле тврдењата за незаконитости.

Критики се упатени и за надворешната политика и трошоците за патувањата на владините делегации. СДСМ тврди дека за лобирање биле потрошени 1,56 милиони долари, а како резултат од меѓународните активности ги наведува средбите во Вашингтон и проектот за антимон.

Во делот за економијата, опозициската партија наведува дека синдикалната потрошувачка кошница, со вклучен трошок за изнајмување стан, достигнува 95.000 денари, додека цените на горивата дополнително го оптоваруваат семејниот буџет.

СДСМ оценува дека земјоделците се соочуваат со проблеми со откупот и субвенциите, а предупредува и на ризици за средствата од ИПАРД поради корупцискиот случај што го споменува во соопштението.

— реклама —

Партијата бара зголемување на минималната плата на 600 евра и ја обвинува Владата дека не обезбедува подобри услови за работниците и пензионерите.

Во соопштението се тврди дека недостигот на средства во Фондот за пензиско и инвалидско осигурување достигнал една милијарда евра. СДСМ истовремено се противи на можни промени во управувањето со средствата од вториот пензиски столб, оценувајќи дека тие би можеле да претставуваат ризик за заштедите на граѓаните.

Опозицијата ја обвинува Владата и за прекумерно задолжување, тврдејќи дека за две години биле создадени четири милијарди евра нов долг. Од партијата бараат одговор за намената на позајмените средства и начинот на кој се трошат.

Во делот за евроинтеграциите, СДСМ се повикува на пораките на претседателката на Европската комисија, Урсула фон дер Лајен, за македонскиот идентитет и јазик, оценувајќи дека власта не обезбедила подобри услови за почеток на следната фаза од преговорите.

— реклама —

Партијата дополнително ја обвинува власта за политичко приближување кон агендите на Русија и Србија, но тие квалификации остануваат ставови на СДСМ.

На крајот од соопштението, СДСМ го отвора и прашањето за можни предвремени парламентарни избори напролет, оценувајќи дека таков потег би можел да биде обид за избегнување на обврските поврзани со Европската Унија.

„Што донесоа две и пол години ВМРО и Мицкоски? Сиромаштија. Изолација. Уништено стопанство. Полош стандард. Уште поголемо иселување на младите. ‘Трета економија’ во Европа со празни паричници и празни фрижидери“, наведуваат од СДСМ.

„СДСМ нема да биде алиби. Власта наскоро се враќа во рацете на граѓаните. Бандата ќе одговара пред независно судство и европско обвинителство“, порачуваат од опозициската партија.