СДСМ: Нема откуп, грозјето скапува, лозарите ги уништуваат насадите

СДСМ обвини дека во Неготинско и Тиквешијата лозарите се соочуваат со сериозен проблем поради отсуство на откуп на грозјето, при што дел од родот скапува на лозјата, а некои лозари почнале да ги уништуваат лозовите насади.

Од партијата велат дека лозарите се оставени без соодветна поддршка и се соочуваат со високи производствени трошоци, додека за грозјето нема сигурен пласман. Според СДСМ, ситуацијата не е проблем само за актуелната реколта, туку претставува закана и за иднината на лозарството во Неготинско и Тиквешијата.

— реклама —

„Нема откуп на грозје. Вранецот не се откупува. Грозјето скапува по лозјата, лозарите се беспомошни“, обвинуваат од СДСМ, прашувајќи каде се Владата и Министерството за земјоделство и дали локалните претставници од ВМРО-ДПМНЕ ќе реагираат.

— реклама —

Од опозициската партија потсетуваат и на критиките што, како што велат, ВМРО-ДПМНЕ ги упатувала кон претходните влади кога била во опозиција, оценувајќи дека денес, кога лозарите имаат проблеми со откупот, нема соодветна реакција.

СДСМ оценува дека лозарите не бараат милостина, туку фер откупна цена, сигурен пласман и конкретна државна поддршка. Од партијата истовремено ја обвинуваат Владата дека наместо средства за субвенции и интервентни мерки, трошела пари за забави и музички настани.

— реклама —

Пратеничката група на СДСМ, како што наведуваат од партијата, предложила три мерки за надминување на состојбата – зголемување на откупната цена за пет денари по килограм, укинување на осумпроцентниот попуст што се бара за побрза исплата и интервентен откуп од страна на државата на црното грозје што ќе остане непродадено.

— реклама —

Од СДСМ бараат Владата итно да реагира, да обезбеди откуп и да го заштити трудот на лозарите.