СДСМ: Платформата „ЗНАМ 2.0“ се активира кога треба да се дефокусира јавноста

СДСМ повторно ја нападна внатрепартиската иницијатива „Разговори за иднината во 12:05“, која партијата ја нарекува „Платформа ЗНАМ 2.0“, тврдејќи дека тајмингот на доставувањето на нејзиниот документ не бил случаен, туку служел за дефокусирање на јавноста од посетата и пораките на претседателката на Европската комисија, Урсула фон дер Лајен.

Од СДСМ прашуваат зошто документот бил доставен токму во периодот кога Фон дер Лајен престојуваше во Скопје и кога во јавноста повторно беше отворено прашањето за европската интеграција на земјата.

„Кога стигна документот од Платформата-ЗНАМ 2.0? Вчера, токму пред прес-конференцијата на Фон дер Лајен, на која кажа дека македонските јазик и идентитет се добредојдени во ЕУ“, велат од СДСМ.

Платформата „Разговори за иднината во 12:05“ вчера ги достави своите предлози во седиштето на СДСМ. Документот го доставија Игор Ивановски, Славјанка Петровска и Коста Начевски, а меѓу предлозите се оставка на претседателот Венко Филипче, одржување конгрес, избор на ново раководство и промени во партијата.

— реклама —

СДСМ, пак, тврди дека документот бил доставен во момент кога јавноста требало да се фокусира на европскиот пат на земјата.

„Уште еден дефокус. Да го тргнат вниманието од главниот проблем: застанувањето на Македонија кон ЕУ. Далечинско кога болат фактите“, велат од партијата.

Во соопштението СДСМ повторно ја отвора и својата иницијатива поврзана со европската јавна обвинителка Лаура Ковеши, тврдејќи дека европските механизми за борба против корупцијата треба да бидат воспоставени пред членството на земјата во Унијата.

„Лаура Ковеши пред членство. Не после“, порачуваат од СДСМ.

— реклама —

Од партијата тврдат дека и претходните јавни настапи на Платформата се случувале во моменти кога СДСМ објавувал информации и обвинувања поврзани со власта.

Како примери ги наведуваат своите претходни тврдења за лобирањето на премиерот Христијан Мицкоски, антимонот и рудниците, трошоците поврзани со настапот на Дејвид Гета, тендерот за фирма која СДСМ ја поврзува со Ќуркчиев, како и наводите за тендерот што партијата го поврзува со Адамовиќ, Мицкоски, Сања Божиновска, Лазаревиќ и „Руднап“.

Сите овие случаи СДСМ ги наведува како свои претходно објавени наводи, додека сега тврди дека Платформата се активира во периоди кога овие теми добиваат внимание во јавноста.

„Сега граѓаните гледаат дека повеќе не е чудно како работи Платформата ЗНАМ 2.0. На далечинско. По потреба. Секогаш во важен момент, кога откриваме работи за иднината на земјата и на граѓаните – баш тогаш се јавуваат шемаџиите“, велат од СДСМ.

— реклама —

Партијата ја поврзува Платформата и со политичките случувања околу Левица, при што повторно ги изнесува своите обвинувања дека станува збор за поширок политички фронт насочен против СДСМ.

„Истите што седат со руската Левица. Анти-НАТО. Анти-ЕУ. Против стратешкиот партнер Америка. Баш со нив прават сојуз“, наведуваат од СДСМ.

Од СДСМ тврдат дека целта на писмото на Платформата не е само внатрепартиска дебата, туку пренасочување на вниманието од темите што партијата ги отвора во јавноста.

„Писмото не е за СДСМ. Писмото е да не се зборува за признатиот македонски идентитет, заглавениот европски пат, Лаура Ковеши, за скандалите на власта, за рудници и за броила“, велат од партијата.

— реклама —

СДСМ порачува дека нема да отстапи од својата политичка агенда и дека ќе продолжи со објавување информации за кои смета дека укажуваат на неправилности во работењето на власта.

„СДСМ не влегува во шемата. Останува со граѓаните и ќе продолжи да се бори за нив и интересите на државата“, се наведува во соопштението.

Од партијата на крајот повторно го поврзуваат своето барање за вклучување европски антикорупциски механизми со одговорноста на актуелната власт.

„Наскоро доаѓа времето на вистина и правда. А бандата ќе одговара пред европско обвинителство“, порачуваат од СДСМ.