СДСМ: Со Мицкоски минималната плата не стигнува ниту за храна – 33% од работниците живеат во сиромаштија

Минималната плата не е доволна ниту за покривање на основните трошоци за храна на едно четиричлено семејство, обвинува СДСМ преку соопштение, посочувајќи дека работниците во Македонија се соочуваат со ниски примања и растечки трошоци за живот.

— реклама —

Според партијата, во октомври за храна и пијалаци биле потребни 26.170 денари, што е речиси 2.000 денари повеќе отколку во јануари. Потрошувачката кошничка надминува 70.000 денари, а со трошоците за стан достигнува и над 90.000 денари.

— реклама —

Од СДСМ наведуваат дека од околу 540.000 вработени, приближно 180.000 земаат месечна плата пониска од 31.200 денари. Тоа, според партијата, значи дека 33 отсто од работниците примаат плата под прагот на сиромаштијата.

„Овие луѓе одат на работа, работат, вложуваат труд и немаат доволно за достоинствен живот – буквално живеат во сиромаштија“, наведуваат од СДСМ.

— реклама —

Партијата го критикува премиерот Христијан Мицкоски, обвинувајќи го дека наместо зголемување на платите, се размислува за увоз на странски работници како евтина работна сила. Во соопштението се посочуваат изјави за можен увоз на 50.000, односно над 100.000 економски работници.

Од СДСМ оценуваат дека ваквата состојба ги остава работниците со ниски примања и без можност да обезбедат достоинствен живот.