СДСМ: Стоилковиќ го велича Младиќ, Мицкоски да одговори дали тоа е став на Владата

СДСМ го осуди однесувањето на министерот Иван Стоилковиќ, откако, според партијата, тој јавно го величал Ратко Младиќ, осуден за геноцид, воени злосторства и злосторства против човештвото.

— реклама —

Од опозициската партија велат дека Стоилковиќ со односот кон Младиќ покажал какви вредности застапува и го обвинија дека воениот злосторник го нарекол „мој генерал“.

СДСМ смета дека станува збор за дел од поширока политичка агенда, која, според нив, вклучува влијание од Србија, Русија и Кина, како и промовирање на концептот на „Српскиот свет“.

— реклама —

„Наместо да гледаме кон иднината, кон Европа, кон демократско и просперитетно општество – ние се враќаме во деведесеттите, во политиката на Милошевиќ и војните“, велат од СДСМ.

— реклама —

Од партијата нагласуваат дека јавното величање на човек осуден за геноцид во Сребреница не може да се оправда како личен став или културна разлика, туку, според нив, претставува сериозна политичка порака.

СДСМ побара од премиерот Христијан Мицкоски да одговори дали ставовите на Стоилковиќ се негов личен став или, како што велат, „официјален став на неговата влада“.

Опозициската партија побара и политичка одговорност, оценувајќи дека за луѓе кои ги величаат воените злосторници нема место во демократска и европска влада.