СДСМ во Битола: Граѓаните се загрижени за своите заштеди по случајот со „Алта банка“

СДСМ обвини дека граѓаните во Битола се соочуваат со неизвесност за своите заштеди по случувањата поврзани со „Алта банка“, а побара истрага и утврдување одговорност од премиерот Христијан Мицкоски и претседателот на Советот на Народната банка, Трајко Славески.

— реклама —

Претставници на партијата денеска излегоа меѓу граѓаните во Битола, каде што, според нивните тврдења, штедачите се соочуваат со проблеми при пристапот до сопствените средства. Од СДСМ посочија дека експозитурите не работат, дел од банкоматите се празни, а на оние што се во функција се создаваат долги редици.

— реклама —

Од партијата предупредија дека особено загрижени се пензионерите, кои, како што наведоа, не можат да располагаат со средствата потребни за секојдневните трошоци, меѓу кои сметки, храна, лекови и греење.

СДСМ тврди дека уште пред 11 месеци предупредувала за ризиците од влезот на „Алта банка“ на македонскиот пазар, а сега побара на штедачите да им биде овозможено целосно да располагаат со своите заштеди.

— реклама —

Партијата побара Трајко Славески да поднесе оставка, да се отвори истрага и да се утврди одговорност. Дополнително, побара од ПИОМ пензиите да не се исплаќаат на сметките на пензионерите во „Алта банка“, со цел, како што наведоа, да се заштитат нивните средства.

— реклама —

Од СДСМ порачаа дека е потребно целосно расчистување на случајот и утврдување на одговорност за настанатата состојба.