СДСМ: Вучиќ преку Орбан ги презема последните слободни медиуми во Србија – на ред е Македонија

СДСМ обвини дека во Србија се спроведува процес на концентрација на медиумската сопственост и дека истиот модел се подготвува и во Македонија. Во партиското соопштение се тврди дека компанијата Alpac Capital, преку унгарски структури блиски до Виктор Орбан, ги презела последните независни српски медиуми, меѓу кои Н1, Нова С, „Радар“, „Форбс Адриа“ и „Данас“.

— реклама —

Од СДСМ наведуваат дека купувач на медиумите е португалската инвестициска група Alpac Capital, преку луксембуршкиот фонд European Future Media Investments, и тврдат дека нејзиниот сопственик Педро Варгас Сантос Давид е запишан како директор на медиумите.

Партијата во соопштението го поврзува Давид со унгарскиот премиер Виктор Орбан преку неговиот татко Марио Давид, за кого наведува дека бил советник и близок соработник на Орбан. СДСМ потсетува и дека Alpac Capital во 2022 година го презела мнозинскиот удел во Euronews, при што, според нивните тврдења, дел од средствата дошле преку унгарски државен фонд близок до Орбан.

— реклама —

Од СДСМ ја поврзуваат оваа мрежа и со компанијата 4iG, која, според нив, веќе ја гради инфраструктурата за медиумска контрола и преку Орбан дошла во Македонија.

— реклама —

Партијата го поврзува и воведувањето на трет мобилен оператор на македонскиот пазар со оваа компанија, посочувајќи ја и средбата на премиерот Христијан Мицкоски со нејзини претставници за време на неговиот престој во Давос.

СДСМ тврди дека истиот модел што, според нив, се применува во Србија се подготвува и во Македонија, со проширување на влијанието врз медиумскиот простор. Од партијата обвинуваат дека целта е воспоставување целосна контрола врз информативниот простор пред изборите и предупредуваат на „медиумски мрак“ и намалување на критичките медиуми.

— реклама —