СДСМ: ЗНАМ во Гостивар го чува идентитетот, а свој нема – има далечинско

СДСМ упати остри критики кон ЗНАМ по настапот на Максим Димитриевски пред граѓаните во Гостивар, обвинувајќи ја партијата дека зборува за заштита на македонскиот идентитет, но истовремено ги повторува ставовите на владејачките партии.

Од СДСМ велат дека Димитриевски најавил разговори со Бугарија, но оти ЗНАМ не отстапува од македонскиот идентитет.

— реклама —

„Прво ја предадоа партијата. Потоа гласачите. Сега се чувари на идентитетот. Свој немаат. Имаат здружение на далечинско. Сателит на арамијата. Столче, тендер, глас во Собрание“, обвинуваат од СДСМ.

Од партијата наведуваат дека македонскиот идентитет, јазикот и културата биле потврдени и во изјавите на претседателката на Европската комисија, Урсула фон дер Лајен, и претседателката Гордана Сиљановска-Давкова.

— реклама —

„Идентитетот го потврди Фон дер Лајен, директно, во Скопје: Европа ве чека со вашиот јазик и вашата култура. Сиљановска рече: заштитени се македонскиот идентитет, јазикот и кулурата“, велат од СДСМ.

Во реакцијата се споменуваат и ставовите на премиерот Христијан Мицкоски и министерот за надворешни работи, Тимчо Муцунски, во однос на Преспанскиот договор и членството на Македонија во НАТО.

— реклама —

Од СДСМ дополнително го критикуваат ЗНАМ и за состојбата со водата за пиење во Гостивар, тврдејќи дека веќе дванаесет недели нема документ дека водата е чиста и безбедна за пиење и дека околу 5.000 луѓе се отруле, дел од нив завршиле во болница.

„Максо го чува идентитетот како плац за Лидл. Нека објаснат во Гостивар што чуваат. Идентитет што не е на маса или партиска каса што е на маса“, велат од СДСМ.

Од партијата бараат одговори и за, како што наведуваат, цената на „столчето“, како и за наводите за бугарски пасоши и фирми.

„ЗНАМ не е отчет. Тоа е филм што веќе го гледавме. Предавство со датум. Втората верзија бара клучеви за 1,6 милиони евра. Првиот пропадна“, стои во реакцијата на СДСМ.