Основното јавно обвинителство Гостивар побара определување 30-дневен притвор за тројцата осомничени во истрагата за загадувањето на водата за пиење во Гостивар, а за нивниот статус треба да одлучи судија на претходна постапка при Основниот суд Гостивар.
Со предлогот за притвор се опфатени в.д. директорката на ЈП „Комуналец“ – Гостивар, Артана Асани, раководителот на Одделението за водовод, Вадедин Даути, и техничкиот директор на претпријатието, Леон Мезини.
Надлежниот јавен обвинител Хазби Исени од ОЈО Гостивар на денешниот брифинг со медиумите изјави дека во оваа фаза истрагата е насочена кон овие три лица, но не ја исклучи можноста таа да биде проширена и на други лица, доколку дополнителните докази го наложат тоа.
Обвинителството соопшти дека е обезбедена целокупната документација од ЈП „Комуналец“ – Гостивар, која ќе биде предмет на детална анализа со цел да се утврдат сите околности што довеле до инцидентот и појавата на епидемија во градот.
Како што беше соопштено на брифингот, на кој присуствуваа државниот јавен обвинител Ненад Савески, вишиот јавен обвинител Фаик Арслани и раководителката на ОЈО Гостивар, Елизабета Јосифовска, истрагата започнала на 16 јули по анонимна пријава од загрижени граѓани. Истражните екипи и дежурниот обвинител веднаш излегле на терен, каде што затекнале три пумпи, од кои две биле во функција.
Потоа биле известени надлежните институции, меѓу кои Агенцијата за храна и ветеринарство и Државниот инспекторат за животна средина, а биле земени примероци од вода од четири локации. Анализите покажале зголемена концентрација на колиформни бактерии на една од локациите, како и повисоко од дозволеното ниво на хлор во примерок земен од јавна чешма.
Во тек се засилени инспекциски контроли и дополнителни анализи на мостри од целиот водоснабдителен систем, како и од градинки, здравствени установи, угостителски објекти, верски објекти и други јавни институции.
Од Обвинителството информираа дека тројцата осомничени се товарат за тешки дела против животната средина и природата, поврзани со загадување на вода за пиење, кривично дело за кое е предвидена казна затвор од најмалку четири години.
Осомничените денеска беа изведени пред судија на претходна постапка, кој треба да одлучи дали ќе го прифати предлогот на Обвинителството за определување мерка притвор.
