Сè беше подготвено, но Трамп се предомисли и го блокираше законот за станови

Американскиот претседател Доналд Трамп во последен момент го откажа потпишувањето на сеопфатниот закон за достапно домување, доведувајќи ја во прашање иднината на еден од ретките двопартиски законски предлози во САД.

Церемонијата за потпишување била закажана за среда напладне во Капитол, а сцената веќе била подготвена со говорница и американски знамиња, додека републиканските лидери во Претставничкиот дом го промовирале законот. Сепак, само неколку часа пред настанот, Трамп објави дека церемонијата се откажува.

— реклама —

„Денешната прес-конференција и потпишувањето на законот за домување се откажуваат сè додека не го усвоиме неопходниот Закон за спас на Америка, кој го сметам за национална вонредна состојба“, напиша Трамп на својата платформа Truth Social.

— реклама —

Предлог-законот, познат како „Законот за домување во 21 век“, имаше цел да ја зголеми понудата на станови, да ги намали трошоците за домување и да го ограничи влијанието на големите корпоративни инвеститори на пазарот на недвижности.

Лидерот на мнозинството во Сенатот, Џон Тјун, изјави дека нема коментар откако ја дознал веста додека се обраќал пред медиумите.

— реклама —

Во изминатите месеци, Трамп неколкупати најавуваше дека нема да потпише други закони додека Конгресот не го усвои неговиот „Закон за спас на Америка“, кој предвидува построги правила за идентификација на гласачите, но засега нема доволна поддршка во двата дома на Конгресот.

— реклама —

Одложувањето на законот за домување претставува удар за републиканците, особено во пресрет на ноемвриските избори, бидејќи високите цени на недвижностите и кириите остануваат едно од најголемите економски прашања за американските граѓани.

Според проценките, цените на домовите во САД пораснале за повеќе од 50 проценти од периодот на пандемијата, додека кириите се зголемиле за над 30 проценти, а недостигот од неколку милиони станбени единици дополнително го зголемува притисокот врз пазарот.