„Се инфилтрирале во умовите на студентите“ – американскиот министер со обвинувања кон Кина

Американското Министерство за одбрана ги прогласи Институтите „Конфуциј“, културни и образовни центри финансирани од Кина на универзитетските кампуси, за закана по националната безбедност на САД. Министерот за одбрана Пит Хегсет тврди дека овие институции биле користени за ширење кинеска пропаганда, кражба на интелектуална сопственост и влијание врз американските студенти.

Во видеообраќање објавено на социјалните мрежи, Хегсет соопшти дека Пентагон ги ставил овие институти на списокот организации што претставуваат безбедносен ризик, обвинувајќи ги дека дејствувале прикриено на американските универзитети.

— реклама —

„Се покажа дека никнале 80 нови пропагандни ќелии на 30 универзитети, кои користеле различни имиња и статути, но со иста цел: кражба на интелектуална сопственост и инфилтрирање во умовите на американските студенти“, изјави Хегсет.

— реклама —

Според американскиот министер, Министерството за одбрана во изминатите два месеца систематски работело на отстранување на овие организации.

Вашингтон со години ги обвинува Институтите „Конфуциј“ дека служат како инструмент за политичко и идеолошко влијание на Пекинг, поради што американските власти претходно преземаа мерки за ограничување на нивното работење.

— реклама —

Институтите, кои се финансирани од Кина, функционираат како центри за изучување на кинескиот јазик и култура, но американските власти изразуваат сомнежи за нивната вистинска улога и поврзаноста со кинеската држава.

Новата одлука на Пентагон претставува дополнително заострување на американскиот пристап кон кинеското присуство во високообразовните институции.

Кинеската амбасада во Вашингтон не одговорила веднаш на барањето на Ројтерс за коментар на обвинувањата.