Се маскирал во жена и бегал низ шума: Уапсен Бразилец осомничен за 16 убиства

Бразилската полиција уапсила маж (33) осомничен за најмалку 16 убиства, кој за време на бегството бил маскиран во жена. Тој бил уапсен по 30-часовна потрага што ја спровеле безбедносните сили во шумска област во Параиба, сиромашна сојузна држава во североисточниот дел на Бразил.

— реклама —

Бразилецот е осомничен дека од мај извршил најмалку 16 убиства, а за време на сослушувањето признал 11 од нив, соопшти локалната полиција. Во моментот на апсењето, осомничениот носел женска облека и долга црна перика, во обид да се преправи и да ѝ избега на полицијата, наведува „Фигаро“.

— реклама —

За време на испитувањето, осомничениот тврдел дека учествувал во вкупно 80 убиства, бројка која истражителите сè уште не ја потврдиле.

Властите не објавиле детали за идентитетот на жртвите ниту за начинот на кој биле извршени злосторствата. Неколку недели пред апсењето, овој маж успеал да побегне по конфликт со безбедносните сили, кои го сметаат за член на „исклучително насилна“ криминална група.

— реклама —

За време на сослушувањето, тој, сепак, рекол дека дејствувал сам и негирал каква било поврзаност со криминалните фракции кои дејствуваат во тој регион.

Осомничениот тврдел дека сите негови жртви биле поврзани со криминалното подземје и дека ја зел правдата во свои раце откако добил закани упатени кон неговото семејство.