Законот за извршување на санкциите се менува, а со измените се брише условот што може да биде главна пречка Александар Пандов да стане директор на Управата со полн мандат, наместо да биде вршител на должноста директор како до сега.
Според важечкиот закон, кандидатот за директор мора да има најмалку десет години работно искуство, од кои пет години во извршувањето на санкциите или во сродни работи. Со предложените измени, овие услови целосно се бришат, а изборот ќе се врши според Законот за високи раководители.
Пандов е дипломиран историчар на Институтот за историја при Универзитетот „Св. Кирил и Методиј“, а од 1998 до 2002 година бил пратеник во Собранието. Во неговата јавно достапна биографија не е наведено дека пред доаѓањето во Управата имал искуство во затворскиот систем, во извршувањето на санкциите или во сродна област.
Сепак, Пандов е в.д. директор на Управата од 2 јули 2024 година. Токму периодот поминат на оваа функција може да му помогне да ги исполни новите услови.
Наместо десет години работно искуство, од кои пет во областа, новиот Закон за високи раководители бара најмалку пет години вкупно работно искуство, од кои две години раководно искуство во област што одговара на работата на институцијата.
До 1 октомври 2026 година, кога треба да почнат да се применуваат измените, Пандов ќе има повеќе од две години раководно искуство во Управата. Ако периодот како в.д. директор му биде признаен во постапката, тој би можел да го исполни новиот услов и да конкурира за директор со полн мандат.
Со измените истовремено се продолжува и мандатот на директорот – од четири на пет години.
Промената не значи дека Пандов автоматски ќе стане директор. Ќе треба да биде објавен јавен оглас и да се спроведе постапка за избор. Но, со бришењето на условот за пет години искуство во извршувањето на санкциите се отстранува главната законска пречка за неговата кандидатура.
Така, искуството што Пандов го стекна како в.д. директор може да му овозможи да конкурира за цел петгодишен мандат – можност што според сегашните услови ја нема.
БОНУС ВИДЕО:
