Овогодинешното божиќно обраќање на кралицата Елизабета Втора се очекува да биде многу емотивно, бидејќи ова е прв Божиќ откако почина нејзиниот сопруг, принцот Филип.
Бакингемската палата објави фотографија на која се гледа како кралицата снима говор, а покрај неа е фотографија на која е со принцот Филип, кој почина на почетокот на оваа година, пренесува АП.
На фотографијата, кралицата го носи истиот брош како на врамената фотографија со принцот Филип, направена за време на прославата на нивната годишнина од брак во 2007 година.
Божиќната порака на кралицата е снимена минатата недела, пред таа да одлучи да го помине Божиќ во Виндзор поради пандемијата на корона вирусот, пренесува АП.
Традиционалната божиќна порака на кралицата, која ќе се емитува во сабота, е обраќање до нацијата и Комонвелтот, а во неа кралицата се осврнува на претходната година.
За кралицата тоа е крајот на годината во која почина нејзиниот сопруг, принцот Филип, со кој помина 73 години во брак.
Принцот Филип почина во април оваа година, два месеци пред неговиот 100-ти роденден.
