(Видео) Се очекува од средина на декември да почне со работа жичарата на Водно

Жичницата на Водно е во фаза на целосна реконструкција, а доколку работите и неопходните безбедносни проверки завршат според планот, се очекува повторно да биде пуштена во употреба веќе следниот месец.

Ова го соопшти градоначалникот на Скопје, Орце Ѓорѓиевски, кој преку објава на социјалните мрежи информираше дека во тек се активностите за обнова на жичницата и темелна реконструкција на кабините.

— реклама —

Како што посочува Ѓорѓиевски, при извршениот увид биле констатирани сериозни недостатоци, кои, според него, се последица на долгогодишното неспроведување на неопходните големи сервиси и редовното одржување од страна на претходните раководства.

Поради утврдената состојба, жичницата била ставена надвор од функција, со цел да се обезбеди безбедноста на патниците.

— реклама —

„За мене, безбедноста на нашиот народ е пред сѐ. Тука нема компромис!“, порача градоначалникот.

Тој информираше дека во тек се работите за реконструкција на кабините, а се очекува да пристигне и новиот мотор.

— реклама —

Ѓорѓиевски најави дека по завршувањето на работите и сите неопходни безбедносни проверки, жичницата повторно ќе ги пречека скопјани и посетителите на градот.

„Го обновуваме она што со години било запоставувано. Со одговорност, со работа и со дела. Го враќаме сјајот на Скопје!“, наведува Ѓорѓиевски.

— реклама —