Се претставиле како полицајци и ја измамиле: Жена оставила 45.000 евра и накит во контејнер за ѓубре во Грција

Лажни полицајци измамиле 75-годишна жена од Лариса, во централна Грција, убедувајќи ја да остави 45.000 евра и накит во контејнер за отпад, откако претходно телефонски ја контактирало лице кое се претставило како нејзина роднина на која ѝ биле потребни пари поради сообраќајна несреќа, пренесуваат грчките медиуми.

Непозната жена во првиот телефонски разговор тврдела дека нејзината роднина е повредена во сообраќајна несреќа и се наоѓа во болница, поради што ѝ се потребни пари, пренесува „Прототема“.

— реклама —

Набргу потоа, ја повикал маж кој зборувал лош грчки јазик и ѝ се заканил со смрт доколку не му ги предаде парите. Потоа следел и трет повик, овојпат од маж кој се претставил како полицаец од одделот за сајбер-криминал.

За да звучи поверодостојно, лажниот полицаец ѝ ги кажал своето име и презиме и ѝ рекол дека е заедно со нејзиниот сопруг, како и дека полицијата се обидува да ги пронајде лицата кои претходно ѝ се заканувале и се обиделе да ја измамат.

— реклама —

Откако успеале да ја убедат дека соработува со полицијата, измамниците ја стекнале нејзината доверба и ја навеле да ги собере парите и скапоценостите од својот дом.

— реклама —

Жената издвоила 45.000 евра и неколку парчиња накит, меѓу кои медалјон, ѓердан и венчални прстени. Сето тоа го ставила во кеса и го оставила во контејнер за отпад пред својата куќа, како што ѝ наложиле измамниците.

Нивни соучесници потоа дошле до контејнерот и ја однеле кесата со парите и накитот, додека жената останала во домот и ги следела телефонските инструкции што ги добивала.

Полицијата во Лариса предупредува дека во последно време е забележан пораст на телефонските измами, особено оние насочени кон повозрасните лица.

Измамниците користат различни методи и се претставуваат како роднини, вработени во електродистрибутивни компании, даночни службеници или полицајци.