Се преврте автобус на патот Тузла – Сараево, 11 лица се повредени

Единаесет лица се повредени во сообраќајна несреќа во која учествувал автобус на јавниот превоз, што утрово се случила на магистралниот пат Тузла – Сараево, во близина на местото Хусино во Босна и Херцеговина.

Според информациите на босанскиот портал „Кликс“, несреќата се случила кога автобусот се превртел, а полицијата ја примила пријавата околу 6:10 часот. На местото веднаш биле испратени полициски патроли и екипи на итната медицинска помош.

— реклама —

Портпаролката на Управата на полицијата при Министерството за внатрешни работи на Тузланскиот кантон, Аднана Спречиќ, потврди дека според првичните информации се повредени 11 лица.

„Според податоците со кои располага Управата на полицијата, повредени се 11 лица“, изјави Спречиќ.

— реклама —

Од Универзитетскиот клинички центар во Тузла информираа дека во болницата се јавиле седум лица по несреќата, од кои еден пациент е задржан на болничко лекување.

„Во УКЦ се јавија седум лица, а на болничко лекување засега е задржан еден пациент со иницијали Х. Б., поради повреди на долните екстремитети. Тој е сместен на Клиниката за ортопедија и трауматологија“, изјави портпаролката на болницата, Ерсија Ашчериќ Мујединовиќ.

— реклама —

Полицијата појаснува дека бројката од 11 повредени е првична и дека постои можност дел од патниците да побарале медицинска помош во други здравствени установи.

За несреќата е известен дежурниот обвинител од Кантоналното обвинителство на Тузланскиот кантон, а увидот го вршат истражители од криминалистичката полиција.

Причините за превртувањето на автобусот засега не се утврдени и ќе бидат предмет на истрагата.

Поради полицискиот увид, сообраќајот на дел од магистралниот пат Тузла – Сараево, во правец кон клучката Шиќки Брод, е целосно запрен. Возилата се пренасочуваат по алтернативни патишта, додека полицијата не дозволува пристап до местото на несреќата.