Се шири огромна зона на топла вода во Тихиот Океан: Се засилува ли супер Ел Нињо?

Необичното ширење на топлата вода во Тихиот Океан предизвикува загриженост кај научниците, додека феноменот Ел Нињо продолжува да се засилува. Најновите мапи покажуваат дека огромната област со натпросечно високи температури на морето добила и дополнителен крак, кој се протега кон југоисточниот дел на океанот.

Податоците на перуанската метеоролошка служба „Сенамхи“ покажуваат дека за само две недели топлината се проширила покрај брегот на Чиле и кон југоисточниот Пацифик.

— реклама —

Во одделни области температурата на морската вода е за повеќе од три Целзиусови степени повисока од просечната. Научниците веќе извесно време предупредуваат дека, доколку се остварат најновите прогнози, овој Ел Нињо би можел да биде најсилниот во последните илјада години.

Се очекува феноменот да го достигне врвот во декември, а неговото влијание врз температурите и врнежите би можело да се чувствува ширум светот со месеци, пренесува „Вечерњи лист“, повикувајќи се на пишувањето на „Дејли мејл“.

— реклама —

Светската метеоролошка организација проценува дека е речиси сигурно оти Ел Нињо ќе продолжи да се задржува до февруари следната година.

— реклама —

Во комбинација со веќе многу топлите океани, овој климатски феномен би можел да го зголеми ризикот од екстремни горештини, поплави и суши во различни делови на светот.

За Обединетото Кралство се прогнозира повлажна и побурна есен, додека зимата би можела да биде постудена и помирна. Таквите временски услови би можеле да го отежнат производството на електрична енергија од ветер и да ја зголемат потребата од природен гас.

Се очекува северозападниот дел на земјата да биде повеќе изложен на обилни врнежи и бури отколку југоисточниот регион.

Ел Нињо е природен климатски феномен што се појавува на секои две до седум години и е поврзан со затоплувањето на површинските води во централниот и источниот дел на тропскиот Тихи Океан. Неговите последици можат да влијаат врз временските услови во различни делови на светот.