Седум дена по катастрофалните земјотреси што ја погодија Венецуела, властите соопштија дека бројот на загинати се искачил на 2.295, додека 11.267 лица се повредени. Спасувачките екипи и понатаму се на терен во обид да пронајдат преживеани под урнатините, иако шансите за тоа со секој изминат ден се сè помали.
Во операциите за спасување учествуваат повеќе од 26.000 припадници на службите за итни интервенции и над 17.000 волонтери. Според официјалните податоци, досега од урнатините живи се извлечени 6.461 лице.
По двата силни земјотреси со магнитуда од 7,2 и 7,5 степени според Рихтеровата скала, кои ја погодија земјата на 24 јуни, регистрирани се уште 782 последователни потреси. Иако нивниот интензитет постепено слабее, сеизмолозите предупредуваат дека сè уште постои опасност од нов, посилен потрес.
Панамериканската здравствена организација предупреди дека последиците од катастрофата сериозно го оптоваруваат здравствениот систем. Според нивните проценки, стотици илјади жители имаат потреба од итна медицинска помош и здравствени услуги.
Организацијата побара од меѓународната заедница финансиска поддршка од 24 милиони долари за обезбедување лекови, вакцини и нормално функционирање на здравствените установи во најпогодените подрачја во следните шест месеци.
Во знак на почит кон загинатите, привремената претседателка Делси Родригез прогласи седумдневна национална жалост. Истовремено, расте незадоволството кај дел од населението, кое смета дека институциите не реагирале доволно брзо и ефикасно во првите денови по разорните земјотреси.
