Министерството за здравство информира дека во текот на оваа недела во земјава се регистрирани седум нови случаи на инфекција со вирусот Западен Нил. Сите новозаболени се од Скопје – по двајца од општините Кисела Вода и Гази Баба и по еден од Илинден, Бутел и Аеродром.
Станува збор за лица на возраст од 60 до 84 години и сите се хоспитализирани.
Во моментов на Универзитетската клиника за инфективни болести и фебрилни состојби се лекуваат 16 пациенти. Кај 15 од нив инфекцијата е лабораториски потврдена, додека за еден суспектен случај се чекаат резултатите. Тројца пациенти се во критична состојба и се интубирани.
Од Министерството посочуваат дека досега во државата се регистрирани вкупно 20 случаи на инфекција со вирусот Западен Нил, а првиот случај бил пријавен на 15 мај годинава во Велес.
Здравствените власти апелираат граѓаните да се заштитуваат од убоди од комарци, да користат репеленти и заштитни мрежи, како и редовно да ги отстрануваат застоените води, кои претставуваат погодни места за размножување на комарците.
