Вирусот Западен Нил повторно е активен во Европа, а оваа сезона се потврдени случаи и во Македонија. Според Европскиот центар за превенција и контрола на болести (ECDC), локално стекнати инфекции се регистрирани во Грција, Италија, Шпанија, Романија и во Македонија, каде досега се потврдени два случаи – во Скопскиот и во Вардарскиот регион.
Иако кај повеќето заразени инфекцијата поминува без симптоми, кај мал број пациенти може да предизвика сериозни компликации, особено зафаќајќи го централниот нервен систем. За болеста сè уште не постои специфичен лек ниту вакцина за луѓе, па превенцијата од убоди од комарци останува најважната мерка за заштита.
Западнонилската треска е вирусно заболување што најчесто се пренесува преку убод од заразен комарец од родот Culex. Природен резервоар на вирусот се птиците, додека луѓето и коњите се заразуваат случајно. Болеста не се пренесува од човек на човек при вообичаен контакт, а исклучително ретко е можно пренесување преку трансфузија на крв или трансплантација на органи.
Кај околу 80 проценти од заразените нема никакви симптоми. Кај приближно една петтина од пациентите се јавува полесна форма на болеста, со висока температура, треска, главоболка, болки во мускулите и телото, замор, гадење, повраќање и кожен осип. Симптомите најчесто се појавуваат три до 14 дена по убодот од комарец.
Кај помалку од еден процент од заразените може да се развијат тешки невролошки компликации, како воспаление на мозокот (енцефалитис), воспаление на мозочните обвивки (менингитис) или, поретко, акутна флакцидна парализа. Најголем ризик имаат лицата постари од 60 години и оние со ослабен имунолошки систем. Силна главоболка, вкочанет врат, нарушена свест, конфузија или слабост на екстремитетите се симптоми што бараат итна лекарска проценка.
Лекувањето е исклучиво симптоматско и поддржувачко, со надоместување течности, намалување на температурата и болничко лекување кај потешките случаи.
Во Европа, според ECDC, заклучно со 15 јули се регистрирани 33 локално пренесени случаи, од кои најмногу во Италија – 20. Во Грција, според Националната организација за јавно здравје (EODY), до 22 јули се потврдени 21 случај, а кај поголемиот дел од пациентите се развиле невролошки компликации. Засега таму нема пријавени смртни случаи.
Во Македонија годинава првиот случај е регистриран кај 55-годишен жител на Велес, а досега се лабораториски потврдени два случаи. Директорот на Универзитетската клиника за инфективни болести и фебрилни состојби, Фадил Цана, потврди дека пациентите се хоспитализирани и под медицински надзор.
Институтот за јавно здравје го оценува моменталниот ризик за населението како среден и препорачува користење репеленти против комарци, носење облека со долги ракави и ногавици, поставување заштитни мрежи на прозорците, избегнување престој на отворено во зори и навечер, како и отстранување на стоечката вода околу домовите, каде што комарците најлесно се размножуваат.
Здравствените власти апелираат граѓаните по убод од комарец да побараат лекарска помош доколку развијат висока температура, силна главоболка, осип или невролошки симптоми.
