Седум случаи на физичко насилство пријавени во полицијата, меѓу нив и напади врз деца

Повеќе случаи на физичко и семејно насилство биле пријавени во полицијата во изминатите денови во Македонија. Меѓу нив има пријави за напади врз сопруги и малолетни деца, како и физички пресметки во Скопје, Гостивар и други населени места.

Во Виница, надворешната канцеларија за криминалистички работи поднела кривична пријава против 48-годишниот Ќ.Ц. од селото Калиманци, осомничен дека на 1 октомври физички ја нападнал својата 38-годишна сопруга и ѝ нанел повреди.

— реклама —

Кривична пријава поднел и СВР Тетово против А.С. од Гостивар, поради сомнение за телесна повреда и насилство врз дете. Според пријавата, на 25 октомври, по расправија, тој со остар предмет ја нападнал својата вонбрачна партнерка, а физички ја нападнал и нејзината малолетна ќерка.

Во селото Октиси, струшко, полицијата ја лишила од слобода 27-годишната Л.Р., по пријава дека физички ја нападнала 46-годишната А.Р. од истото село. При постапувањето, жената им соопштила на полициските службеници дека користела марихуана и им ја предала заедно со метална дробилка. Предметите биле одземени, а по документирањето на случајот ќе следуваат соодветни пријави.

— реклама —

Во Скопје биле пријавени уште неколку случаи. Дваесет и петгодишниот Б.М. пријавил дека на 28 октомври, околу 8:40 часот, на пешачки премин во Карпош, едно лице удирало по неговото возило, а потоа и физички го нападнало.

— реклама —

Истата вечер, полицијата го лишила од слобода 35-годишниот Д.Д. од скопско, по пријава од неговата 19-годишна сопруга дека ја нападнал и со тврд предмет оштетил дел од покуќнината.

Физички напад врз вработена во средно училиште во Карпош, исто така, бил пријавен во СВР Скопје. Според пријавата, 50-годишната Б.Ш., која работи во училиштето, била нападната од малолетник додека била на работното место.

Во казино во скопската општина Кисела Вода, пак, 18-годишниот Д.Ј. од селото Бразда пријавил дека бил нападнат со тврд предмет од лицето А.Ѓ.

Полицијата презема мерки за расчистување на пријавените случаи, а за дел од нив по целосното документирање ќе бидат поднесени соодветни пријави.