Извршниот директор на Microsoft, Сатја Надела, предупреди дека компаниите кои користат вештачка интелигенција ризикуваат да ја изгубат контролата врз своите највредни деловни информации, доколку безрезервно се потпираат на големите AI-модели.
Во објава на својот блог, Надела истакна дека корисниците на системите за вештачка интелигенција, како оние развиени од OpenAI и Anthropic, не плаќаат само за користење на технологијата, туку потенцијално им откриваат и вредни деловни податоци на компаниите што ги развиваат овие модели.
„Компаниите, во суштина, плаќаат за интелигенцијата двапати – еднаш со пари, а вторпат со нешто уште повредно: знаењето што мора да го откријат за таа интелигенција да биде корисна“, наведува Надела.
Тој смета дека дел од овие информации претставуваат специфично деловно знаење кое конкурентите не би можеле да го стекнат на друг начин.
Надела исто така оцени дека компаниите кои развиваат вештачка интелигенција не можат истовремено да бараат слободен пристап до јавно достапните податоци за обука на своите модели, а притоа да ги ограничуваат другите компании во анализата и користењето на резултатите добиени од тие модели за развој на сопствени системи.
Посебно ги критикуваше практиките според кои производителите на AI-модели го задржуваат правото да учат од податоците што ги добиваат преку користењето на нивните услуги.
Според првиот човек на Microsoft, компаниите треба да ја задржат целосната контрола врз своите податоци и да избегнуваат зависност од само еден давател на услуги за вештачка интелигенција.
