Шефот на НАСА, Џаред Исакман, повторно отвори дебата која се сметаше за затворена пред повеќе од две децении – дали Плутон треба повторно да биде класифициран како планета. Тој го изнесе својот став за време на сослушување во американскиот Сенат, истакнувајќи дека силно ја поддржува таа идеја, пренесува „Фјучеризам“.
„Апсолутно сум во таборот кој се залага Плутон повторно да стане планета“, изјави Исакман, додавајќи дека НАСА „во моментов работи на одредени документи“ со цел да се поттикне нова научна расправа околу статусот на Плутон. Тој нагласи дека целта е да се врати признанието на Клајд Томбо, американскиот астроном кој го открил Плутон во 1930 година.
Статусот на Плутон беше променет во 2006 година, кога Меѓународната астрономска унија донесе нова дефиниција за планета. Според неа, небесното тело мора да орбитира околу Сонцето, да биде доволно масивно за да има сферична форма и да го „исчисти своето соседство“ од други објекти. Плутон не го исполнува третиот критериум, поради што беше прекласифициран како џуџеста планета.
Одлуката тогаш предизвика големи реакции во јавноста, каде што многумина сметаа дека Плутон неправедно е „деградиран“. Сепак, дел од научната заедница ја поддржува промената и смета дека новата класификација подобро го опишува Сончевиот систем.
Астрономот Мајк Браун од Калифорнискиот институт за технологија оцени дека научниците ќе продолжат да ги објаснуваат и класифицираат објектите на начин кој помага за подобро разбирање на вселената. Од друга страна, Бил Меккинон од Универзитетот Вашингтон смета дека расправата е „губење време“, нагласувајќи дека Плутон е џуџеста планета и дека главната дилема е терминолошка, а не суштинска.
Иако научната заедница останува поделена околу дефиницијата, многумина се согласуваат дека ова прашање треба да го решаваат експертите, а не институционални или политички изјави, и дека дебатата за Плутон најверојатно ќе продолжи и во иднина.
