Министерката за одбрана, Радмила Шеќеринска која нема висока функција во СДСМ, денеска собираше отпад во Општина Дебрца, на десетина километри од Охрид. На минатите парламентарни избори, Шеќеринска беше носителка на листа токму во изборна единица пет, која ја опфаќа и Дебрца. Дека денеска била вклучена во еколошка акција, објави и самата таа. А на терен била со кандидатот на СДСМ за Дебрца. Ова остава впечаток дека сепак, таа ќе биде вклучена во изборната кампања, иако не е потпретседател на СДСМ.
„Денеска-26 септември, се одбележува Светскиот ден на чисти шуми. По тој повод во организација на ОО СДСМ Дебрца, а со присуство на другарката Радмила Шеќеринска, како и кандидатот за Градоначалник- Игор Крцоски-Манце и кандидатите за советници се одржа еко акција за одбележување на овој ден во с. Велмеј. Шумите се природно богатство кое треба да го чуваме и заштитиме. Повикуваме на граѓанска свест, за чиста животна средина, чисти шуми во кои сите ние ќе можеме да уживаме и да ги користиме благодетите на природата кои Дебрца ги нуди во огромни количини“, напишаа од општинската организација на партијата.
