Семејството на Периш барало полицијата веднаш да ги обезбеди снимките, но тоа се случило дури 14 дена подоцна

Семејството на 32-годишниот Кристијан Јосип Периш, кој на 21 октомври почина во Психијатриската клиника „Свети Иван“ во Јанкомир, Загреб, уште два дена по неговата смрт поднело кривична пријава до надлежните институции, предупредувајќи на сомнежи за несовесно лекување. Во пријавата изрично било побарано итно да се обезбедат снимките од болничкиот видеонадзор, но полицијата ги презела дури на 6 ноември, односно 14 дена подоцна, објави „Индекс“.

Според информациите на хрватскиот портал, семејството на 23 октомври ја доставило пријавата до Општинското казнено државно обвинителство во Загреб и до Втората полициска станица на Загрепската полициска управа. Истата документација била приложена и во пријавата до здравствената инспекција при Министерството за здравство.

— реклама —

Во пријавата било побарано да се обезбедат снимките од видеонадзорот во сите простории на болницата, бидејќи семејството се сомневало во околностите под кои починал 32-годишникот. Снимките подоцна се покажале како клучен доказ во истрагата против четворица медицински техничари осомничени за тешко убиство.

Здравствената инспекција ја примила пријавата на 26 октомври, а потоа спровела надзор во болницата. Во извештајот биле утврдени неправилности во медицинската документација и отстапувања од пропишаниот протокол при физичкото ограничување на Периш. Сепак, со надзорот не биле откриени сите околности на неговата смрт што подоцна биле забележани на снимките.

— реклама —

Според наодите на инспекцијата, тогашната директорка Мајда Грах дознала за смртта на пациентот на 21 октомври околу 22:25 часот. Следниот ден, според нејзиното сопствено сведочење, усно побарала од информатичката служба да ги зачува снимките, а на 23 октомври добила потврда дека тоа е сторено.

Меѓутоа, снимките ги прегледала дури на 4 ноември, речиси две недели по смртта на пациентот. Според нејзиното сведочење, тогаш забележала несоодветно постапување на медицинските техничари. Полицијата била известена на 5 ноември, а следниот ден снимките биле доставени во полициска станица.

— реклама —

Здравствената инспекција во соопштение од 12 ноември потврдила неправилности во евидентирањето на физичкото ограничување на Периш. Надзорот продолжува, а инспекторите дополнително треба да утврдат зошто снимките биле прегледани со задоцнување, кога Министерството било известено за случајот и дали претходно имало поплаки за работата на одредени вработени.

Првичната пријава на семејството се однесувала на сомнеж за несовесно лекување. По прегледувањето на видеоснимките, против четворица медицински техничари била покрената истрага поради сомнеж за тешко убиство на особено ранлива личност.

— реклама —

Според сомнежите на обвинителството, техничарите го удирале Периш, му го притискале телото и му ставале перница врз лицето додека бил врзан за болничкиот кревет. Обвинителството смета дека биле свесни за можноста од неговата смрт и се согласиле со таквиот исход.

„Индекс“ наведува дека сè уште нема добиено одговор од Државното обвинителство за кривичната пријава, а прашања испратил и до загрепската полиција.