Сензорна соба со специјализирана опрема отворена во Основното училиште „Петар Поп Арсов“ во Карпош

Подобрени услови за поддршка на учениците се обезбедени во ООУ „Петар Поп Арсов“, каде што денеска беше отворена нова сензорна соба. Просторот е наменет за учениците на кои им е потребна дополнителна сензорна поддршка и е опремен со различни реквизити и дидактички помагала.

— реклама —

На отворањето присуствуваше градоначалникот на Општина Карпош, Сотир Лукровски, кој ја поздрави иницијативата и донацијата со која се унапредуваат условите во училиштето.

— реклама —

Сензорната соба е донација од Здружението на граѓани „ПОЗИТИВО“ од Скопје, во вкупна вредност од 134.997 денари. Во просторијата се поставени опрема и помагала што овозможуваат стимулација на сетилата, развивање на моторичките способности и создавање пријатна и безбедна средина за учениците.

Меѓу опремата се соодветна подлога, платнена лулашка, трамболина со рачка, проектор „Ѕвездено небо“, душек, сензорно огледало, меки ѕидни панели, графомоторичка табла, прилагодлив тунел и магнетни плочки. Донацијата го опфаќа и поставувањето на целокупната опрема.

— реклама —

Со новиот простор училиштето добива дополнителни можности за реализација на активности приспособени на индивидуалните потреби на учениците, со цел да се поттикнат нивниот развој, учењето и благосостојбата.

Иницијативата, како што е наведено, ја потврдува важноста од соработката меѓу образовните институции, локалната самоуправа и граѓанскиот сектор за создавање поинклузивна и поддржувачка училишна средина.