Начинот на кој се определува притворот е еден од најважните показатели за почитувањето на човековите права и владеењето на правото, порача министерот за правда Јетон Шасивари на промоцијата на „Прирачникот за примена на мерката притвор низ призмата на членот 5 од Европската конвенција за човекови права“.
Според Шасивари, прирачникот претставува важна практична алатка за судиите, јавните обвинители, адвокатите и другите правни професионалци, особено во насока на унапредување на судската и обвинителската практика и доследна примена на европските стандарди за заштита на човековите права.
„Кога зборуваме за притворот, зборуваме за една од најчувствителните точки на кривичната постапка – моментот кога државата го ограничува едно од најосновните човекови права – правото на слобода“, истакна Шасивари.
Тој нагласи дека притворот не смее да се определува автоматски, ниту пак да се користи како замена за пресуда, при што особено ја истакна важноста на презумпцијата на невиност.
„Притворот не смее да стане инструмент на автоматизам. Не смее да стане замена за пресуда. И најважно – не смее човекот да биде третиран како виновен пред да биде донесена правосилна одлука за неговата вина“, порача министерот за правда.
Како што истакна Шасивари, лишувањето од слобода може да биде оправдано само кога постои конкретна, реална и индивидуално утврдена причина, а целта на постапката не може да се постигне со примена на поблага мерка.
„Секоја одлука за притвор мора да одговори на едно суштинско прашање: Зошто токму ова лице, токму сега и токму во овие околности, мора да биде лишено од слобода?“, рече тој.
Министерот посочи и на значењето на практиката на Европскиот суд за човекови права во предметите против Македонија, како и на потребата оправданоста на притворот да се проценува континуирано, а не само во моментот кога тој се определува.
Според него, владеењето на правото не се оценува единствено преку ефикасноста на државата во откривањето и гонењето на кривичните дела, туку и преку начинот на кој таа постапува кога ограничува нечие право на слобода.
Прирачникот треба да придонесе за поголема правна сигурност, поквалитетно образложување на одлуките и усогласена примена на европските стандарди во практиката.
Министерството за правда, како што беше посочено, ќе продолжи да ги поддржува иницијативите за унапредување на правосудниот систем, зајакнување на професионалните капацитети и доследна заштита на човековите права.
„Наша заедничка одговорност е да градиме правосудство во кое граѓаните ќе имаат доверба и систем во кој човековите права нема да бидат само запишани во законите, туку доследно ќе се применуваат во практиката. Затоа што правдата не е само во донесувањето на одлуката. Правдата е и во начинот на кој таа одлука е донесена“, порача Шасивари.
