Шасивари: Јавните политики мора да се темелат на знаење и факти

Министерот за правда Јетон Шасивари денеска учествуваше на тркалезната маса „Унапредување на истражувачко-аналитичката функција во политичките партии – правни и компаративни искуства“, при што ја истакна потребата јавните политики да се темелат на знаење, факти и квалитетни анализи.

Шасивари посочи дека партиските истражувачко-аналитички центри (ПИАЦ) имаат значајна улога во унапредувањето на квалитетот на политиките, јавната дебата и демократските процеси.

— реклама —

„ПИАЦ треба да бидат места каде што политиката се соочува со фактите, а податоците и анализите се користат за одлуките да бидат подобри“, порача Шасивари.

— реклама —

Тој нагласи дека користењето јавни средства за финансирање на ПИАЦ носи и јавна одговорност, особено во поглед на квалитетот на истражувањата, анализите и препораките што произлегуваат од нив.

„Јавните средства мора да произведуваат јавна вредност. Тие средства се наменети за истражување, анализа, развој на политики и градење стручни капацитети. Затоа е потребно да имаме не само правила за тоа како се трошат средствата, туку и култура на одговорност за тоа што произведуваат тие средства. Кои истражувања се направени? Кои анализи се подготвени? Кои политики се евалуирани? Кои препораки произлегле од нив? Како се користеле податоците? Каков придонес имале овие центри во развојот на политиките? Тоа се прашањата што треба да ги поставуваме. Не за да ја ограничиме политичката работа, туку за да ја направиме посериозна, поквалитетна и поодговорна“, нагласи Шасивари.

— реклама —

Министерот ја истакна и важноста на меѓупартиската соработка во областа на истражувањето и знаењето.

„Можеме да не се согласуваме околу решенијата, но можеме да се согласиме дека решенијата треба да се темелат на точни податоци и сериозна анализа“, истакна Шасивари.

Како што посочи, Министерството за правда има одговорност да обезбеди јасна и функционална правна рамка.