Шасивари од Будва: Криминалот не смее да се исплати, а незаконски стекнатиот имот не смее да остане кај сторителите

Борбата против корупцијата мора да се преточи во конкретни резултати, особено кога станува збор за високата корупција и конфискацијата на незаконски стекнатиот имот. Ова го порача министерот за правда Јетон Шасивари на Министерскиот форум ЕУ – Западен Балкан за правда и внатрешни работи, што се одржува во Будва, каде што учествуваше на панел посветен на антикорупциските активности.

Шасивари истакна дека владеењето на правото и сузбивањето на корупцијата се клучни за демократската стабилност и довербата во институциите. Посебно се осврна на предметите од високата корупција, оценувајќи дека нивното ефикасно решавање е еден од најважните показатели за независноста и функционалноста на правосудниот систем.

— реклама —

Во таа насока, министерот ги претстави законодавните реформи, меѓу кои подготовката на нов Кривичен законик и нов Закон за кривичната постапка. Со нив се предвидуваат построги санкции за коруптивните дела и поефикасни механизми за конфискација на незаконски стекнатиот имот.

— реклама —

„Нашата цел е јасна – криминалот не смее да се исплати, а незаконски стекнатиот имот не смее да остане во рацете на сторителите“, порача Шасивари.

Тој ги посочи и подготвените измени на Законот за спречување на корупцијата и судирот на интереси, новиот Закон за заштита на укажувачите и измените на Законот за лобирање. Целта е посилна контрола на имотната состојба, спречување судир на интереси и поголема одговорност на институциите.

— реклама —

Министерот се осврна и на активностите за зајакнување на интегритетот во правосудството. Во соработка со ОБСЕ, претседателите на основните судови од апелациските подрачја Штип, Гостивар, Битола и Скопје потпишале политики за интегритет. Се унапредуваат и механизмите за дисциплинска одговорност и професионално постапување, а шестиот евалуациски круг на ГРЕКО е дополнителна можност за процена и подобрување на антикорупциските мерки.

— реклама —

Говорејќи за меѓународната соработка, Шасивари нагласи дека корупцијата не познава граници и дека нејзиното сузбивање бара размена на информации и координирано дејствување со европските институции, меѓу кои и ЕВРОПРАВДА.

Тој ја поздрави и новата антикорупциска стратегија на Европската Унија, истакнувајќи ја важноста на поддршката од Европската комисија за спроведување на реформите и постигнување видливи придобивки за институциите и граѓаните.