Шефот на американската разузнавачка агенција во Москва, Кремљ негира дека знае нешто

Директорот на Централната разузнавачка агенција на САД, Џон Ретклиф, во вторникот наводно престојувал во Москва, објавија американските „Си-Би-Ес“ и „Аксиос“, повикувајќи се на свои извори. Посетата засега не е официјално потврдена ниту од Вашингтон ниту од Москва.

Доколку информациите се точни, ова би било прво познато патување на Ретклиф во Русија откако во 2025 година ја презеде функцијата директор на американската разузнавачка агенција.

— реклама —

Според податоците од платформата за следење летови „Флајтрадар24“, американски воен авион во вторникот наутро полетал од Латвија во правец на московскиот аеродром Внуково. Истиот авион во неделата полетал од воздухопловната база Ендрјус во близина на Вашингтон и слетал во Рига, а во вторникот вечерта ја напуштил Москва.

— реклама —

Причината за наводната посета на Ретклиф не е позната. Меѓу можните теми за разговор се споменуваат војната во Украина, конфликтот со Иран, како и можни преговори за размена или ослободување на затвореници.

Кремљ засега не потврдува дека Ретклиф бил во Москва. Портпаролот на Кремљ, Дмитриј Песков, на прашање за наводната посета изјавил дека не располага со таква информација. Тој претходно соопштил и дека за оваа недела не е планирана средба во Кремљ со претставници на американската администрација.

— реклама —

САД и Русија и во минатото одржувале контакти преку високи претставници на разузнавачките служби, а Вашингтон и натаму бара враќање на неколку американски државјани кои се наоѓаат во руски затвор.

— реклама —

Посетата, доколку биде потврдена, би се случила во период кога мировните преговори за Украина се во застој. Американскиот претседател Доналд Трамп претходно најавуваше брзо завршување на конфликтот, но досега не е постигнат конечен мировен договор.

Според „Фајненшл тајмс“, САД добиле уверување од Украина дека нејзините беспилотни летала нема да ја напаѓаат Москва и уште неколку други подрачја во периодот на патувањето на високиот американски претставник. Ова се случува во услови на засилени украински напади врз цели на руска територија.