„Шефот на македонската банда е Мицкоски“ – Кузеска со тешки обвинувања по падот на Вучиќ

Падот на Александар Вучиќ на изборите во Србија ќе отвори истраги што, според СДСМ, ќе ги разоткријат наводните криминални и деловни врски меѓу српската власт и премиерот Христијан Мицкоски. На прес-конференција, членката на Извршниот одбор на СДСМ, Богданка Кузеска, изнесе серија обвинувања за енергетски бизниси, банки, медиумско влијание, политички партии и организиран криминал.

„Историската победа во Србија го донесе падот на Александар Вучиќ, менторот на Христијан Мицкоски. Како што најавивме, доаѓа време за размонтирање на балканскиот криминален октопод и одговорност“, изјави Кузеска.

Таа тврди дека изборниот исход во Србија ќе овозможи отворање истраги за бизнис-мрежи што, според СДСМ, се поврзани со Мицкоски. Во тој контекст ги спомена Адамовиќ, „Руднап“, министерката Сања Божиновска, како и бизнисите со електрична енергија и броила.

— реклама —

Кузеска повторно го отвори и случајот со пет тони дрога, тврдејќи дека наркотиците поминале од Македонија во Србија и завршиле кај структури поврзани со Српската напредна странка (СНС), без досега да има одговорност.

„Се објавуваат информации за тоа кој е „Оскар“ во преписките на наркобосовите од платформа „Скај“. Допрва ќе почнат истрагите во Србија а тоа ќе доведе и до линковите во Македонија“, рече Кузеска.

Од СДСМ ја споменаа и „Алта банка“, обвинувајќи дека нејзиното присуство во Македонија е дел од поширока финансиска поврзаност со Србија. Кузеска тврдеше дека банката била запрена во Европа и дека во Македонија се применува истиот модел на вложување капитал, но на прес-конференцијата не беа приложени конкретни документи за овие тврдења.

— реклама —

Дел од обвинувањата беа насочени и кон медиумите. Кузеска ги посочи Драган Павловиќ Латас и Ивона Талевска како учесници во, според неа, организирана негативна кампања против СДСМ и партискиот претседател Венко Филипче. Таа ги спомена и српските медиумски брендови „Еуроњуз“ и „Ало“, како и наводната употреба на бот-мрежи и дигитални платформи поврзани со СНС за поддршка на ВМРО-ДПМНЕ.

Кузеска изнесе и тврдења за поврзаност меѓу лобистички структури, компанијата „4iG“, унгарскиот премиер Виктор Орбан и проекти поврзани со антимон. Во истиот контекст спомена наводни апсења на министри во Унгарија и истрага за кинески кредит, без да претстави докази што би ги поврзале овие случаи со македонскиот премиер.

СДСМ ги обвини и ЗНАМ и Левица дека се дел од политички модел преземен од Србија, чија цел, според Кузеска, е поделба на опозициските гласови.

— реклама —

„И конечно, сега на граѓаните им е јасно дека по истиот рецепт на Вучиќ од Србија се прават партии-сателити - за да се цепка опозицискиот глас“, изјави таа, додавајќи дека СДСМ се смета за единствена опозиција што не е контролирана од власта.

Најострите обвинувања Кузеска ги упати директно кон Мицкоски и ВМРО-ДПМНЕ.

„Позади сето ова стои една криминална организација. Нејзиниот дел во Македонија е ВМРО - организирана криминална група, а шефот на македонската банда е Христијан Мицкоски“, рече Кузеска.

Таа најави дека политичките промени во Србија ќе донесат и разврска на случаите што СДСМ ги поврзува со македонската власт.

„Следат разврски, следат истраги, следи расчистување со криминалната организација, делче по делче. Сите тие разврски ќе завршат и во Македонија со соработниците на Мицкоски“, порача Кузеска.

Во доставеното обраќање не се наведени конкретни официјални истраги против Мицкоски или други македонски функционери што произлегуваат од изборниот исход во Србија. Изнесените обвинувања се политички тврдења на СДСМ, а не судски утврдени факти.