Генералниот секретар на Обединетите нации, Антонио Гутереш, во своето последно обраќање пред Генералното собрание ги повика светските лидери да преземат чекори за регулирање на вештачката интелигенција, ставање крај на војните, справување со климатските промени и реформирање на институциите на ОН.
Гутереш, чиј втор петгодишен мандат завршува на 31 декември, побара воспоставување глобален надзор над ризиците поврзани со вештачката интелигенција. Тој оцени дека земјите што ја предводат технолошката револуција треба да соработуваат при проценката на ризиците и создавањето заеднички заштитни мерки.
Тој истакна дека е потребна мултилатерална рамка за управување со ризиците од развојот на вештачката интелигенција, поддржана од независен надзор.
Во говорот, Гутереш се осврна и на состојбата во ОН, предупредувајќи дека механизмите за колективно дејствување се под сè поголем притисок и дека глобалните институции сè уште ја одразуваат распределбата на моќта од едно поинакво време.
Тој повторно го поддржа решението со две држави – Израел и Палестина, а повика и на поголема посветеност кон справувањето со климатските промени.
Осврнувајќи се на состојбата на Блискиот Исток, каде што тензиите остануваат високи, Гутереш повика на деескалација и дијалог.
„Борбите мора да престанат. Хуманитарната помош мора да се одвива непречено. Правата и слободите на пловидба мора целосно да се обноват во согласност со меѓународното право“, порача тој.
Гутереш, во текот на своето десетгодишно раководење со ОН, се залагаше организацијата да има поголема улога во посредувањето во конфликти и управувањето со новите технологии. Во 2023 година, ОН формираа советодавно тело за вештачка интелигенција, составено од 39 членови.
Последното обраќање на Гутереш пред Генералното собрание беше проследено со долг аплауз од делегатите. Тој порача дека светот има потреба од посилна меѓународна соработка во услови на растечки глобални предизвици.
