Британскиот нафтен гигант „Шел“ разгледува можност за продажба на својот хемиски бизнис во САД за околу осум милијарди долари, во обид да го насочи работењето кон основната дејност – производството на нафта и гас.
Според „Фајненшл тајмс“, за хемиската дивизија интерес покажале „ЕксонМобил“ и инвестициската компанија „Аполо“, а меѓу потенцијалните купувачи се споменува и кувајтската државна нафтена компанија „Кувајт петролеум корпорејшн“.
Неколку заинтересирани компании веќе доставиле првични понуди, и тоа за целата дивизија или за одделни делови од бизнисот.
„Шел“ во САД има четири хемиски постројки во Луизијана, Тексас и Пенсилванија, каде што се произведуваат хемикалии што се користат во производството на пластика, лекови, средства за чистење и други производи.
Сепак, извори запознаени со процесот за „Фајненшл тајмс“ велат дека „Шел“ сè уште нема донесено конечна одлука за продажбата.
Доколку целата дивизија биде продадена за околу осум милијарди долари, сумата би била значително помала од вкупните инвестиции што компанијата ги вложила во американскиот хемиски бизнис.
И по евентуалната продажба, „Шел“ би задржал значаен дел од своето работење во САД, меѓу кои се платформите за експлоатација на нафта на море и рафинериите.
