„Шкода“ повлекува 1,7 милиони автомобили: Дефект на управувачот може да доведе до губење контрола

„Шкода“ повлекува околу 1,7 милиони автомобили ширум светот поради можен дефект во системот за управување, кој во најлош случај може да доведе до откажување на управувањето.

Со повлекувањето се опфатени моделите „Кодијак“, „Карок“, „Октавија“ и „Суперб“, произведени во периодот од ноември 2015 до август 2026 година. Не се опфатени автоматски сите автомобили од овие модели, туку конкретните возила се утврдуваат според идентификацискиот број на возилото – VIN.

— реклама —

Според германскиот автомобилски клуб ADAC, само во Германија повлекувањето опфаќа 370.347 автомобили на „Шкода“, додека на глобално ниво станува збор за 1.719.030 возила.

Причината е завртка во системот за управување која под одредени услови може да кородира. Од „Шкода“ објасниле дека проблемот може да се појави особено по долготрајна употреба на возилото во подрачја каде што на патиштата се користи сол.

— реклама —

Доколку завртката се скрши, во најлош случај може да дојде до откажување на управувањето.

Германската Сојузна управа за моторен транспорт – KBA го регистрирала повлекувањето под референтниот број 17091R, додека кодот на производителот за акцијата е 48LS.

— реклама —

Решението предвидува замена на проблематичната завртка во системот за управување со нова, поотпорна на корозија.

Повлекувањето на „Шкода“ е дел од поширок проблем во рамките на групацијата „Фолксваген“. Претходно беа опфатени и милиони возила од брендовите „Фолксваген“, „Ауди“ и „Сеат“ поради сличен проблем со завртка во системот за управување.

— реклама —

„Фолксваген“ претходно соопшти дека при интерни проверки на квалитетот бил откриен можен проблем со управувањето кај одредени возила од повеќе моделски серии.

Сопствениците на „Шкода Кодијак“, „Карок“, „Октавија“ и „Суперб“ од наведениот производствен период треба да проверат дали нивното конкретно возило е опфатено со сервисната акција, бидејќи самата припадност на еден од четирите модели не значи дека автомобилот задолжително е предмет на повлекувањето.