Додека кинеските автомобилски брендови сѐ повеќе ги намалуваат цените и вршат притисок врз европските производители, групацијата „Фолксваген“ бара нови решенија за поевтини модели на европскиот пазар.
Едно од можните решенија е малиот SUV модел Kylaq на „Шкода“, кој моментално се произведува и се продава во Индија, а би можел да пристигне и во Европа како еден од најевтините нови автомобили на континентот.
Kylaq беше претставен кон крајот на 2024 година, а во Индија се продава за околу 6.800 евра. Иако во Европа сигурно би бил поскап, сепак би чинел значително помалку од актуелниот најевтин модел на „Шкода“, Fabia, чија цена е нешто под 20.000 евра.
Извршниот директор на „Шкода“, Клаус Целмер, изјави дека постои „деловна логика“ за разгледување на ваков потег.
„Кога ќе ја погледнете Fabia и ќе ја отстраните целата дополнителна опрема, цената останува под 20.000 евра. Од друга страна, ценовната позиција на Kylaq отвора огромен простор“, рече Целмер за Auto News.
Моделот веќе бележи успех во Индија. Од јануари годинава се продадени повеќе од 50.000 примероци, што помогна продажбата на VW групацијата во Индија да се удвои во 2025 година.
Kylaq е базиран на платформата MQB-A0, развиена специјално за поевтини пазари и за конкуренција со брендови како Hyundai и Maruti Suzuki.
SUV моделот го придвижува 1,0-литарски турбобензински мотор со 113 коњски сили, комбиниран со мануелен или автоматски менувач.
Доколку „Шкода“ одлучи да го пласира Kylaq во Европа, автомобилот ќе мора да биде прилагоден на европските безбедносни и еколошки стандарди, особено поради строгите правила за емисии на штетни гасови.
Компанијата би можела тоа да го компензира преку зголемена продажба на електрични и plug-in хибридни модели, како Elroq и Enyaq, кои веќе бележат солидни резултати на европскиот пазар.
