Шпанскиот министер одбива да поднесе оставка по судирот на возовите со 69 загинати

Шпанскиот министер за транспорт Оскар Пуенте одби да поднесе оставка по тешката железничка несреќа во која загинаа најмалку 69 лица, нагласувајќи дека неговата обврска во моментов е да ги решава проблемите и да помогне целосно да се утврдат причините за трагедијата.

— реклама —

На прес-конференција во Мадрид, Пуенте изјави дека „нема што да крие“ и повтори дека владата ќе ги испита сите околности на несреќата. Тој порача дека сè уште има многу прашања на кои треба да се одговори, но дека сега не е време да се разговара за неговото останување на функцијата.

— реклама —

По несреќата, која се случи во средата на железничката линија Мадрид–Севиља, во покраината Толедо, оставка од министерот побараа политички противници, синдикати и демонстранти кои се собраа пред Министерството за транспорт.

— реклама —

Според објавените информации, воз на државната компанија „Ренфе“, кој се движел со брзина од 160 до 200 километри на час, удрил во задниот дел на друг воз на компанијата „Ирио“, кој бил запрен. Во несреќата загинале најмалку 69 лица.

Шпанскиот премиер Педро Санчез изјави дека довербата на јавноста во железничката мрежа е нарушена, оценувајќи како неприфатливо тоа што во период од само една година се случиле две слични трагедии. Во јануари, на истата линија Мадрид–Севиља, кај местото Адамус во јужниот дел на Шпанија, во судир на возови загинаа 46 лица.