Што го „убива“ модерниот тенис? Долги мечеви, густ календар и сè повеќе повреди

Сè поголемиот број повреди и откажувања на врвните тенисери повторно го отвораат прашањето за условите под кои денес се игра професионалниот тенис. Долгите мечеви, густиот календар, високите температури, материјалите и честото менување на топчињата се наведуваат како фактори што дополнително ги оптоваруваат играчите.

— реклама —

Италијанскиот весник „Газета дело Спорт“ се осврна на проблемот по серијата повреди и повлекувања на тенисери од светскиот врв. Последен во низата е Џек Дрејпер, кој ја заврши сезоната порано од предвиденото.

— реклама —

Во последниот период со повреди се соочија и Карлос Алкараз и Јаник Синер. Двајцата имаа периоди на отсуство – Шпанецот поради повреда на зглобот, а Италијанецот поради проблеми со коленото.

За разлика од периодот пред околу 30 години, кога најдобрите тенисери можеле повнимателно да го планираат распоредот на настапи, денешниот систем на задолжителни турнири и мастерс-турнири што траат по две недели ги принудува играчите да настапуваат речиси без прекин.

— реклама —

Според неодамнешни истражувања, повредите и откажувањата на АТП-турнејата се зголемиле за 25 отсто, додека повредите на горните екстремитети и рамото бележат зголемување од повеќе од 100 отсто во споредба со претходните децении.

„Тенисот во минатото фаворизираше полинеарни движења, рамни или удари со спин и помала употреба на ротација на зглобот и трупот“, вели Клаудио Цималја, италијански физиотерапевт кој работел и со Новак Ѓоковиќ.