Четири години по целосната инвазија на Украина, Русија се соочува со зголемено незадоволство и нов бран на внатрешни тензии, додека јавниот притисок врз претседателот Владимир Путин станува сѐ повидлив, пишува Си-Ен-Ен.
Во повеќе руски градови се забележуваат чести прекини на интернет-услугите, што сериозно го нарушува секојдневниот живот, додека властите тврдат дека мерките се дел од борбата против безбедносни закани и тероризам.
Истовремено, руските безбедносни служби ја засилуваат репресијата врз медиумите и културниот сектор. Во последните недели се спроведени рации и апсења на издавачи и новинари, меѓу кои и случаи поврзани со наводна „ЛГБТ пропаганда“.
Меѓу целите на истрагите се нашле и издавачки куќи поврзани со млади автори, како и дела со ЛГБТ тематика, што властите ги третираат како екстремистички содржини по одлука на рускиот Врховен суд од 2023 година.
Паралелно со тоа, ограничен е и пристапот до независни медиуми. Повеќе новински организации, меѓу кои и Новаја Газета, се соочуваат со рации и притисоци, додека некои изданија се принудени да престанат со печатење.
Властите забраниле и дел од западните социјални мрежи, додека промовираат државно контролирани дигитални платформи.
Извештајот наведува и дека руските власти ги обновуваат симболите на советската ера, вклучително и именувања поврзани со поранешни безбедносни структури, што дополнително ја засилува загриженоста за враќање на авторитарните практики.
И покрај економските последици од војната и притисокот врз јавноста, Путин изјавил дека прекините на интернетот се поврзани со безбедносни операции и спречување напади, додавајќи дека дел од ограничувањата се „неопходни во услови на воен конфликт“.
Според Си-Ен-Ен, ваквите мерки укажуваат на продлабочување на државната контрола врз информациите и секојдневниот живот во Русија.
